2Th 1 | BEF | STEP | Oho, Tesalonika metoga mono naga'ise. Lenali afotifu Hu'mamofihi to Sipi Boti Yesu Kilisitohi naga'ise. Nani Poluita hiti Silasi hiti to Timotiu hiti ma fayapo koyoto nolepune.

2 Thessalonians 1

1 Oho, Tesalonika metoga mono naga'ise. Lenali afotifu Hu'mamofihi to Sipi Boti Yesu Kilisitohi naga'ise. Nani Poluita hiti Silasi hiti to Timotiu hiti ma fayapo koyoto nolepune. 2 Afotifu Hu'mamofihi to Sipi Boti Yesu Kilisitohi ai fuluna'a to lenehe'mose'na'a lenalitoga buto liloto mineno.

Yesu alina yupahi ka foya lilana ka'a

3 Lalalutigita, lali asaga yupahi lenali kumu yabe luto Hu'mamofitoga fokehi lito minolata nohune. Lenali Hu'mamofitoga keheli amuya melelata nehanamofihi hofa tana'mu luto komopatini ai eminogo ai eminogo hilana hofa tana'mu luto bati huto fokehi nolune. 4 To bona'magi kalana'i mele lepelete kaso'a hiti'nagu he'mi lepelete te'ahago lenali lenaginaga fise'na lite mine'ahana Hu'mamofitoga keheli amuya melete ule'ale hite fa'mene nehabe. Yamofihi kehelilototi Hu'mamofihi yagapana'a mine lite bi'ahana enalitoga lenugufa lelito tilata nohune.

5 Lenalitoga lenugupisalo leniginaga fise'na huto nohinamofihi hapa'a yana'mu ma luto lilune. Hu'mau keheli fotogo huto ka foya lilina kana'agu lenali kumu keheli bati hinogo lenele'malina'mu yabe. Lenali ai'a kapo'agu bi falalana'mu kaso'a hiti nasanamofihi gupisalo lenali hiti nehabe. 6 Ya'mu minoto Hu'mau lenali kumu keheli bati higo kaso'a hiti nasana li lepilata nehana bona'i enalitoga ana suhi huto eniginaga fise'na enalitoga aku'i epilina'mu yabe. To lenali hiti lali hiti lele'mo fulu hilube'mu nohuto laga hina hite minalana'mu yabe. Sipi Boti Yesuhi ya'ma amuya'a hiti agelo'a hiti enele'moto kokulumaguti limilina yupahi, 8 logo guluya meha'a sipi'a hiti limiloto Hu'mamofihi mekeheli'ahana bona'i to Sipi Bomo Yesuhi ka lamana'a keheli meemi'ahana bona'i nona'a foya epilina'mu yabe. 9 Ya nohuto Sipi Bomofihi gobisa'aloti amuya'amofihi fana mehena'a fitu fo he'milenogo logo hepatoga bite minoba minoba hilana'mu yabe. Hu'mau nona'a foya ana huto epilina'mu ni'ibe. 10 To ana yupapoya Yesuhi bona'amagi asaga'i yege'a fite enegelo bite fokeha'a lilana'mu yabe. To aitoga keheli emi'ahana bona'i asaga'i gi'a liyafa hite minalana'mu yabe. Lenali ya'ma kaga'a lu lepugo kehelite aitoga agoya hu emi'ahana ni'inagihe. Ya'mu lenali Hu'mamofihi bona'i hiti minalana'mu ni'ibe.

11 Ya'mu lali hiti kana'amu kana'amu lenali kumu yabe luto Hu'mamofitoga lulata nohune. Hu'mau elesa molo lepi'ehinamofihi legeya'amo kehelinogo lamana'a hilibe luto loka nohone. To ai'a amuya'aloti fi hetofa hu lepelenogo lamana'amu kehelite neminamofihi legeya'a lolo hilabe luto to aitoga keheli ule'ale hite aitoga agoya hu emilata nehanamofihi foya'a lelite bilabe luto nolune. 12 To lenali ya hilenogo Hu'ma to Sipi Boti Yesu Kilisitou mehi lepilata nohinamo ni'ibe. Sipi Boti Yesuhi ai'a gi'a lenali ya'ma liyafa hilabe to ana huto lenehe'mose'na'a lenalitoga huto nehinogo ai hiti lenigitini liyafa hilina'mu yabe. Ya'mana lali ai'a loka nohone.